नवी दिल्ली : घरगुती गॅस सिलिंडरच्या दरात वाढ झाल्यानंतर आता सर्वसामान्यांना एक मोठी दिलासा मिळणार आहे. खाद्य मंत्रालयाने बुधवारी घेतलेल्या खाद्यतेल कंपन्यांच्या बैठकीनंतर खाद्यतेल स्वस्त होण्याचा मार्ग आता मोकळा झाला आहे. या बैठकीत सर्व तेल कंपन्यांचा सहभाग होता आणि यावेळी खाद्यतेलाच्या किमतीत आणखी कपात करण्याच्या उपाययोजनांवर चर्चा करण्यात आली.
एमआरपीमध्ये (MRP) बदल करण्याच्या सूचना सरकारने कंपन्यांनामागे दिल्या होत्या. खाद्य आणि सार्वजनिक वितरण विभागाच्या म्हणण्यानुसार, आगामी काळात दरात आणखी कपात होऊ शकणार आहे. सध्याच्या परिस्थितीत प्रति लिटर 20 रुपयांनी दर कमी करण्याचा सरकारचा अंदाज आहे आणि सरकारने बोलावलेल्या बैठकीत काही तेल कंपन्यांनी दर आणखी कमी करण्याचे मान्य केले आहे.
आंतरराष्‍ट्रीय बाजारात खाद्यतेलाच्या किमती घसरल्‍यानंतर देशांतर्गत बाजारातही किंमती कमी होण्याचा मोठा अंदाज आहे. सरकारने तेल कंपन्यांना एमआरपीमध्ये कमी झालेल्या किमती सुद्धा रिफ्लेक्ट करण्यास सांगितलेले आहे. यासाठी तातडीने पावले उचलण्याचे आश्वासन कंपन्यांना देण्यात आलेले आहे. या बैठकीला केंद्रीय खाद्य विभागाचे सचिव सुधांशू पांडेही यावेळी उपस्थित होते.
लिटरमागे 15 रुपयांची घसरण झाली होती
गेल्या काही दिवसांत देशभरात शेंगदाणा तेल वगळता पॅकिंग केलेल्या खाद्यतेलाच्या किरकोळ किंमती 15-20 रुपयांनी कमी झाल्या आहेत आणि त्यावेळी खाद्यतेलाची किंमत 150 ते 190 रुपये प्रति किलोदरम्यान घसरली होती. आता त्यात आणखी घट होण्याची शक्यता आहे आणि यापूर्वी हा दर 200 रुपयांच्या पुढे गेला होता.